انتصار ضد تعدد التيار

انتصار ضد تعدد التيار

السلام عليكم ورحمه الله وبركاته

فى تحقيق خاص من نوعه وفى مقابله غامضه جدا مع الست انتصار بعد توقف دام اكثر من سته اشهر .. قررنا نحن المفتش دودو بمفهوميتى وفقاقتى الغير محدوده المعالم انى استضيف الست انتصار واخد رايها فى موضوع تعدد التيارات الدينيه فى مصر حاليا

وكالعاده جاءت الست انتصار وضاربه بوووز طوله يجى شبر ونص كده وهى بتنفخ وبتقول حسبى الله ونعم الوكيل هى الثوره دى ملعونه لعنه الفراعنه يا اختى ..

ليه بس خير يا ست انتصار ايه اللى حصل مالها الثوره .. احنا متكلمناش مع بعض من قبل الثوره بفتره

انتصار: ايه يا اختى لا فى اهلا ولا سهلا ولا حتى كوبايه ليمون فى الحر ده  وانتى قاعده كده فى التكييف ولا على بالك انتى واللى زيك

اتفضلى الليمون يا ست انتصار .. معلش احنا اسفين على عدم الضيافه بس كنا عايزين نريح حضرتك

انتصار: تريحينى ليه  ربنا اللى بيريح .. ما علينا انتى كنتى عايزه ايه؟
ولا حاجه حضرتك احنا كنا بنحاول نتصل بحضرتك عشان ناخد رايك لاننا عارفين ان ليكى باع طويل فى مجال النقد والانتقاد الذاتى والنفسى
انتصار: خير يا حبيبتى عايزه تاخد رايى فى ايه؟
والله فى الحقيقه هو اليومين دول زى ما حضرتك شايفه فى خناقات وصراعات وتعددات فى التيارات الدينيه وكنا عايزين نعرف وجهه نظرك
انتصار: تعدد ايه؟ انتوا فاكرينه جواز وتعددوا فيه ولا واحد ميت تعددوا عليه .. اسالى السؤال صح يا اختى ..
طب ايه السؤال الصح يا ست انتصار؟
انتصار: السؤال يا حبيبتى هو ايه رايك فى المتاجره باسم ادين باختلاف اشكاله؟ وتقولولى مثقفين ولا انتوا فاهمين حاجه
اه ما علينا ياريت حضرتك توضحيلنا وجهه نظرك
انتصار: وجهه نظرى بسيطه مفيش تعدد فى التيار ولا فى البحار .. فى دين اسلامى ودين مسيحى .. هتقوليلى بقى سلفى واخوانى وتكفير وهجره  يبقى كل واحد عايز ياخد التورتايه لوحده ويقول دى حقى وانا الصح
طيب ايه بردو وجهه نظرك
انتصار : يوووه .. فى ايه يا اختى ما قولتلك متاجره باسم الدين وكل واحد طالع دلوقتى من مخبأه واللى مكانلوش لسان بقى له عشرتاشر لسان ... انا اعرف المسلم يطلع يقول انا مسلم والمسيحى يقول مسيحى.. نعمل بقى منهج فى الدراسه ونقسمه شويه سلف وشويه اخوان وشويه مسلمين بالاسم ونقيم عليهم الحد؟
يا ست انتصار مالك عصبيه كده ليه بالراحه علينا مالهم يعنى السلف ماهم ماشين على منهج الرسول وسنته
انتصار: انتى يا اختى بتسالى وتجاوبى .. هم ماشين على سنه الرسول .. والاخوان ماشين على سنه مين؟ وانتى ماشيه على سنه مين .. فى حاجه اسمها  متزمت وملتزم ومش ملتزم .. لكن تقوليلى ده ماشى على نهج الرسول والباقى ولاد تيت .. اقولك روحى بقى الله يرحمنا
طيب استهدى بالله .. مش هطول عليكى وانتى متنرفزه كده .. انت عايزه تقولى ايه؟
انتصار: انا عايزه اقول ان الرسول قال " لا فرق بين عربى أواعجمى الا بالتقوى" فين بقى التقوى اللى هم ماشين بيها والاخوان بيشدوا من ناحيه والسلفين من ناحيه واحنا فى النص بقى شكلنا زى كفر قريش كده .. والاقباط اللى عايشين وسطنا .. تيجى تتكلمى وتقولى فين حقهم زى الرسول ما كان بيتعامل معاهم يقولوا يا بخـت المسيحين بيكى وانتى بتدافعى عن حقهم وسايبه حق اخواتك المسلمين
طب ماهو صحيح يا ست انتصار مش من الاولى اننا ناخد حق المسلمين الاول؟
انتصار: وسعى مخك ده شويه وانتى عامله زى طبق البطاطس اللى ملهاش طعم كده ... انا بتكلم اهو وبقول كلنا مسلمين وفى وسطنا مسيحين اخد حق المسلم ومجيش على حق المسيحى لان ده اللى اتعلمناه من الاسلام ... مش الاقى واحد سلفى يجى يبصلى من فوق وتحت ويقول استغفر الله العظيم اللهم اهديها .. والاقى واحد اخوانى يبصلى ويقول حسبنا الله نعم الوكيل ... ويحسسونا اننا مش مسلمين ويحتكروا الاسلام لنفسهم .. هو فيه ايه انتى جايبانى تعلى عليا الضغط؟
يا حاجه انتصار اهدى بس مين قال انهم احتكروا الدين بس الدين للجميع
انتصار: لا يا اختى بيحتكروه على نفسهم ويعمل ندوه ويقول نحن الاخوان المسلمين .. طب والباقى اخوان كافرين؟ واحنا السلفيين والباقى هجاصين ولا ايه ؟ احنا كده وقفنا على الاعراف ومبقناش عارفين رايحين فين وكل الناس بقيت مقسومه  على 3 نصين فيهم فاهم انه هو الصح والنص التالت واقف يتفرج مش عارف مين الصح
طيب خلاص احنا اسفين اننا ضايقناكى ... ممكن تهدى وتقوللنا نعمل ايه؟
انتصار: اه يا اختى اقول وما اقولش ليه ... اللى عنده عقل وعنين .. وبيمشى على رجلين ...يقرا القرآن والسنه ويمشى عليهم

انت مش محتاج لتيار عشان تبقى مسلم

وفى نهايه حوارنا مع الست انتصار احب اقولكم انى اسفه انى استضافتها لانى حسيت انى توهت انا كمان وربنا يتولانا

يا بلادى أنا امتى هكبر وأطول النخل وأقدر!!

يا بلادى انا امتى هكبر وأطول النخل واقدر!!

هـُــــــــــــــــــــــــــــــوى أصحابـــى!

وانا قاعده كده مخنوقه وعندى حاله ملل من النت والكمبيوتر والحياه باكملها خاصه انى بقالى مده مش عارفه اتلم على ورق وقلم واكتب اى حاجه!

لأن الحياه بقيت متقندله بستين قنديل .. لا قنديل ايه هى متهببه بستين هباب ...خاصه بعد احباط اخر مسابقه للتربيه والتعليم.

وانا قاعده كده جاتلى مسج على الفيس بوك اغنيه بكار ومكنتش سمعتها من زمان اوى .. لقيت منير بيقول .. تمرين اول وتانى وسؤال فى عنيه نادانى .. كنت مفكره انه هيساله اما اكبر هشتغل ولا لاء .. لقيت بكار ده غلبان اوى وبيقوله

يا بلادى انا امتى هكبر وأطول النخل واقدر!!

قولته اسكت لنا ساكت يا عم بكار ده سؤال يا راجل .. بالزمه فى حد يسأل عمو محمد منير  فى سؤال تافه كده؟

يا ترى بكار كان قصده ايه؟ قصده فعلا انه نفسه يكبر ويقدر انه يلمس النخل ويجيب بلحه من النخله ويقول هُـــــــــوى اصحابى انا اخيرا قدرت اجيب بلحه طعمها حلو من فوق النخله؟ ويطلعلهم لسانه وياكلها ويمشى!

ايه التخلف ده ؟ معقول؟.بكار اعقل من كده يا جماعه ده مثل اعلى وقدوه لكل الشباب الى زى الورد .. بكار لو كبر ولمس النخله مش هياكل بلحه واحده منها ... ده هيأكل النخله بفروعها كمان لو قدر .

بكار لو يعرف انه بعد ما يكبر لا هيطول بلح النخله ولا حتى بلح الشام كان قال يا ريتنى كنت فضلت صغير ولا كبرت ولا طولت النخل !

ويا سلام لو كان بكار بقى كبر وطول كده وبقى شاب طويل عريض يفّرح كده زى باقى شباب البلد وبعد ما كبر وحقق امنيته ولمس النخله الى قدام بيتهم  الى كان زارعها وهو عيل صوغنون عنده حداشر سنه طلع فوق النخله لقاها 

(( خــــــــــــــــــاوية على عروشـــها))

.. ايه ده خاوية ؟؟ اسمها متنفضه يا استاذة ..

اه ممكن وليه لاء ممكن يكون واحد زميله  زى الواد حسونه بتاع المشاكل ده مستناش انه يكبر وفضل كل يوم يرمى طوبه وياخد البلح من النخله اول باول و فضل يلم فى البلح ده يوم ورا التانى من غير ما بكار ياخد باله وعمله تمر وعلى ما كبر عمل خميره حلوه وبقى معاه فلوس كتير وعمل مشروع يأكله لــــــــــــــــوز و وعمكم بكار عمال يدرس ويرسم ويلعب مع الست رشيدة واخد الشهادة وعلقها لمامته على باب الأوضة وقعد جنبها وبعد ما كبر ملقاش ولا بلحه فى النخله!

لا وايه شوفوا بقى الكوبليه الى خنقنى بيقول لمــصر ايه

.. واقطف من ورد توشكى واعملك عقد مرمر .. يعنى هم استصلحوا توشكى مخصوص عشان يزرعوا فيها ورد وبكار يجيب رشيدة وتلعب هنا وهناك وتقعد تقوله ماء ماء يقولها كلى الى يعجبك يا رشيده ده خير بلدنا !

وحياة خالى حسن الى ما اعرفه انا ما سمعت عن مشاريع توشكى دى الا وانا فى سن عمكم بكار ده ومن يومها ماسمعت عنها تانى ولا سمعت انهم استصلحوا مشاريع تانيه ولا حتى مشاريع توشكى جابت نتائج مفرحه ولا سمعت ان شباب بلدنا راحوا اشتغلوا ولا سمعت ان البطاله مشكله واتحلت وعمالين يقولوا توشكى جديده سنه الفين ..نستنى بقى عشرتاشر سنه كمان عشان تبقى الفين وعشرتاشر على ما توشكى تخلف بامبينو جديد ويسموه توشكى الاول ..

هاروح اجيب مج شاى واجى احسن انا دمى فار ...

-_-_-_-_-_-_-_-_-_-_-_-_-_-_-_-_-_-_-_-_

انا جيت وجبت قطه للفار الى كان هنا من شويه ...  بس بصراحه القطه قامت بالواجب لانه كان فار ابن تيت تيت عمال يلعب فى مخى .. وكان ممكن اقول حاجات ملهاش اى اساس من التهييس.

وبعد ما شربت مج الشاى الغلبان الى قرفاه فى حياته معايا قررت انى متكلمش تانى عن بكار ولا عن حلمه انه يبقى نخله .. عفوا انه يكبر ويلمس النخله !

لانى بعد ما حققت ودقتت فى بواطن الامور اكتشفت انى بتعب نفسى على الفاضى  وعماله اخد فى شهادات وكورسات وحوارات فارغه وبدفع فلوس ودم قلب ابويا  فى بلد لو كحت فى الفحت مش هلاقى بشهادتى ده اى وظيفه لا مرموقة ولا محروقة !!

وهاسرح بالشهادات بتاعتى عن قريب فى سوق العمله الحره وابيعهم واخد فلوسهم واشترى توك توك احسن اهو حاجه تتدخلى فلوس بدل ما انا عاطله عن العمل وعاله على ابويا كده ... وتبقى مصيبه لو قالولى ان شهاداتى لوكال وملهاش لازمه وفى منها كتير وفاصلوا معايا فى الاسعار... ساعتها بقى هطلب مساعده الجمهور !

الخروف لما يطيح بيندبح!

الخروف لما يطيح بيندبح!

السلام عليكم ورحمه الله وبركاته

كل سنه وانتوا طيبين يا حلوين

عيد اضحى مبارك علينا وعلى جمهوريه مصر الفرعونيه والامه الاسلاميه

الست والدتى ست مثقفه جدا جدا رغم انها مأخدتش حتى الابتدائيه ولأنها مثقفه وفاهمه الدنيا من منظور خاص جدا فبالتالى بنتها طالعه زيها .. ده الى هو انا.. اسم النبى حارسنى وصاينى من عين الحساد

المهم انى كنت فى نقاش حاد مع الست الوالده حول الحاجات الى كانت بتحصل اليومين الى فاتوا عشان الخرفان بتوع الجزائر دول (مقدرش اقول اخوان والا يبقى بشتم نفسى)

قالتلى فى كلامها ان المصرى اعظم شعب فى الدنيا وان حضارتنا من الالاف السنين

وان احنا دايما بنبقى احسن بس الشعوب التانيه بتهبط من عزيمتنا عشان لو فوقنا لنفسنا هنبقى احسن منهم مليون مره

قولتلها يا حاجه ده كلام الاساطير والبؤين الحلوين الى انتى بتقوليهم دول بقوا لا مؤخذه(حامضين )

قالتلى بت انتى احترمى نفسك واعرفى انك مهما كبرتى واتعلمتى كتير وقليل فده لانك مصريه عزيمتك وذكائك والتزامك اقوى من اى شعب تانى.

قولتلها بصى يا مامتى انا من جيل بيقول افحت فى البسكويت قدر المستطاع علك تحصل فى النهايه على بيتى فورايه!

ولان الحمدلله الاقتصاد بتاعنا زى الفل ومش محتاجين نفحت فى الصخر.. يا امى احنا جيل مش لاقى ياكل واللى مبياكلش مبيفكرش بيبقى لا مؤاخده زى الطور الى مربوط فى ساقيه بيلف وهو مش عارف بيلف ليه

قالتلى مهو ده بقى الى حصل للمصريين بعد ايام الحضارة ما خلصت وشبعنا كلام عليها تملكنا الجبن وبقينا نخاف من اى حاجه ونقول (يا حيطه دارينا) وفضلنا ننزل من مستوانا واحده واحده لحد ما بقينا من دول العالم التالت

قولتلها طب وانتى ايه وجهه نظرك عن الخرفان بتوع الجزائر دول ؟

قالتلى تعرفى ان فى واحد يهودى توصل استثماراته فى امريكا لدرجه انه اكبر مستثمر اجنبى هناك وانه اما بيحصل حاجه لاسرائيل وامريكا مش بتتدخل مجرد انه يهدد بسحب استثماره تلاقى امريكا واقفه زى الاسد فى وش العرب؟

قولتلها مفهمتش وجه نظرك يا أمى .. لا مؤاخذه واحده واحده كده

قالتلى يعنى او المصريين ميبقوش جبناء ويسحبوا استثمارهم من هنا هتلاقى اقتصادهم بقى فى الارض مش زى المستثمر الى طلع فى التليفزيون وقال ان المصريين عايشن فى جنه الله فى ارضه فى الجزائر وان الخرفان الجزائرين بيعاملوهم احسن معامله اهو ده بقى خروف زيهم !

قولتلها ماما انتى بتتكلمى بجد هو انتى مسمعتيش ان اسرائيل او ايران مستنيه ان المصريين يسحبوا استثمارهم هناك عشان تاخد مكانهم؟

قالتلى يكون احسن اهم يتربوا الهمج دول واحنا مالنا خلينا فى نفسنا لو كل مستثمر هناك عمر حتى من الصحراء مش هنحتاج لحد بره مصر ولا شبابنا هيتغربوا ويتبهدلوا فى دول العالم ولو مزنوق اوى وعايز يستثمر برة مصر .. يستثمر فى حته تكون محترمه ومعروفه بالاحترام وشعبها يستاهل

قولتلها يا امى المصريين المستثمرين الى هناك بيقولوا دى مكيده معموله عشان شركات تانيه تاخد مكانهم وانهم مش ممكن يستسلموا ويسلموا بالساهل وان دى حرب بارده عليهم.

قالتلى لاء دول عالم مالهمش غير ان يبقى معاهم فلوس وولادنا هم الى بيتبهدلوا فى الغربه وخلاص الى زى دول المفروض يخلوهم هناك ويسحبوا منهم الجنسيه المصريه لانهم معندهمش كرامه!

قولتلها يا امى مصر ام الدنيا وهى الاخت الكبيره ولازم تستحمل الخرفان الصغيرين لما يغلطوا.

قالتلى الخروف لما يطيح بيندبح!

قولتلها كفايه لحد كده يا امى لانى هدون كل كلمه انتى قولتيها ولو امن الدوله جه هقولهم امى اهى وهسلمك بايدى انا ماليش دعوه .