أنــا جيت يا ولاد أنا جيت يا ولاد

أنــا جيت يا ولاد أنا جيت يا ولاد

ده رمضان مش انا و انا لو جيت يعنى هتفرحوا ليه ... يلا ما علينا

كــــــل سنه وانتم طيبين يا حلوين

وطبعا كل رمضان وانتم واكلين وشاربين ومتهنيين

اكيد هيبقى حر جامد موت وربنا يستر على الكتاكيت الحلويين الى زيكوا

رمضان ده شهر البركه والخير ... الناس فاكره انه بركه وخير ليه يا ترى؟

عشان الاكل فيه كتير؟؟

ولا لانهم معظمهم بيختموا فيه القرآن الكريم؟

ولا لانهم بيتصدقوا طول الشهر من غير ما يتخنقوا؟

ولا لانهم بيصلوا الصلاه فى وقتها؟

هو ليه رمضان شهر الخير والبركه؟

السؤال ده الواد ابن اخويا سألهولى ..

ولأنه لسه صغير قالى انه بيحب رمضان عشان العصير فيه كتير والكنافه والقطايف

وكمان لانه بيجيب مدفع ويفضل طول اليوم يصدع فى دماغى بالفرقعه بيه

وانه بالليل بيتفرج على بكار والمسلسلات الى ورا بعضها طول الليل

ولما سالته ورمضان السنه دى ايه المميز فيه؟

قالى بوجى وطمطم راجعين تانى

قولتله برافو عليك يا حبيبى اوجزت يابنى متعلم متعلم يعنى

انت هتصوم يا حبيبى؟

قالى طبعا هصوم انا كبرت ولازم اصوم

قولتله طب والصلاة؟

بصلى باستغراب فكملت وقولتله

وقراءة القرآن؟

قالى انتى غريبه يا عمتو ده امر مفروغ منه ..

بنفس الصيغه كده (ده امر مفروغ منه) تقريبا هو اتعدى منى ومن اسلوبى

بس المشكله انى سألته .. ازاى امر مفروغ منه؟

قالى ان كل سنه فى رمضان بلاقى كل المحلات مشغله قرآن ومتسمعيش ولا اغنيه

والجوامع فى كل صلاه بتبقى مليانه ناس ومش لاقيين مكان يصلوا فيه كمان

قلتله اه وهو ده امر مفروغ منه؟

قالى ايوه يا عمتو لان بعد رمضان الناس بترجع تانى لطبيعتها

قلتله ليه هى الناس بتتحول فى رمضان؟؟

قالى يعنى ايه بتتحول؟

قلتله لا ده امر باين عليه مفروغ منه!!

الكلام الى هقوله دلوقتى بنقوله كل سنه

ليـــــــه ميكونش رمضان طول السنه؟

كلها ايام ربنا واحنا مسلمين... ولا ايه؟

مش ممكن نفضل طول السنه مهملين فى طاعه ربنا ونجى نتعبده شهر واحد ونقول

رمضان كريم

الكلام ده اكيد مفروغ منه!!

نيجى للجديد

مع انه مش جديد دى بقيت عادات فاسده ماشيين عليها

انت هتعمل ايه فى رمضان

اليوم من اوله :

هتتسحر وتصلى الفجر وتنام

تقوم الساعه 12 عشان تتوضى وتصلى الضهر

من الضهر للعصر هتروح تعملك شويه حاجات ومشاوير والبنات هتفضل تطبخ

العصر يأذن تصلى وتروح تلعب كوره انت واصحابك لحد المغرب

والبنات اكيد هيحضروا السفره

المغرب تأذن تفطر وتصلى المغرب وتنزل ..

والبنات هتتفرج على التليفزيون لحد السحور طبعا

تيجى العشاء تصلى وتتفرج على شويه مسلسلات وتخرج تانى

وتيجى على الساعه 2 ونص تجيب السحور وتتسحر وتصلى الفجر وتنام

اتحداك لو عملت غير كده

اتحداااااااااااك!!

ولو الشيطان سابك شويه ممكن اول يومين تقرأ جزئين قرآن ولا حاجه

وهترجع تانى زى ما كنت

محبطه يا دوليتا .. ايه ده يا ساتر عليكى .. خليكى متفائله يا شيخه !

تتحدانى؟؟

ابقى تعالى هنا وقولى انى غلطانه وانا هصدقك

المهم الواد ابن اخويا اما لقانى سرحت كده

قالى طب هو انتى هتتفرجى على بوجى وطمطم السنه دى

قلتله اكيـــــــــــد ده أمر لابد منه!!!

بـــ قرش بـــركه لو سمحت وخليه على النوته...

السلام عليكــم ورحمـة الله وبركاتــة ،،

ازيكم يا حلوين يا طعمين اكيد واكلين وشاربين ومرتاحين

ربنا يديمها نعمه علينا وعليكم

ما علينا...

انا كنت جايه ليه؟؟

اه افتكرت كنت جايه احكيلكم الى حصل مع نايف (على اساس انه خليجى بقى) وده يبقى صاحب صاحبى

المهم الواد بيحكيلى بيقولى ايه بقى

كنت ماشى فى الشارع انا وصاحبى نايف واذ فجأه لقيت طابور طويـــــــــل وعريض فى نفس الوقت

(هم اصلا طابورين واحد للستات وواحد للرجاله بس العتب على النظر ) ولقت صويت وخناق وناس بتموت بعض وكلام كتير ومنك لله يالى كنت السبب

لقيت صاحبى نايف عمل عمليه تمحيص وتفحيص وسألنى فى سؤال وقالى : ايش هذا يا صديقى؟

( على اساس انه مش واخد باله او مش فاهم) اصلهم بعيد عنكم مبيفهموش

اتارى بقى ايه .. انه ده يطلع ايه.. ده طابور العيش بتاعنا اصل احنا بنقف فى طابور طويل كده شبه بتاع المدرسه

هو المفروض فى واحد للستات وواحد للرجاله بس هم خلوه واحد بس وفى رئيس للطابور .. اه زى بتاع المدرسه كده

رئيس الطابور ده بيظبط المسائل ويمشى الستات الحلوه الاول قبل الرجاله الى وراهم شغل .. قال يعنى وراهم الديوان ده مجرد شغل مش حاجه يعنى

المهم عمكم نايف سألنى انتوا ليه عندكم فى مصر بتقفوا فى طابور العيش ليه العيش مش بيجى لحد البيت زى عندنا؟

قلتله: ايــــــــــــه انت بتقارن بلدنا ببلدكم يابنى انت هتهزر؟.. احنا الاصل واحنا التقدم انت بتتكلم ازاى ..

احنا لازم نتعب ونشقى عشان نلاقى لقمه العيش ده مثل مشــــــــــهور اوووووووووووووووووى حتى اسأل منى ذكى

قالى بجد هو ده التقدم فعلا ومن جد وجد ومن زرع حصد ومن وقف فى طابور العيش لقى لقمه العيش

والله برافوا على الى ماسكين فرن العيش بتاعكم انهم بيخليكم تجتهدوا كده اناهتناقش مع السيد الوالد فى موضوع انشاء طابونه عيش عندنا

عشان نحث الناس على الجهد والمثابره واهو نتعلم من المصريين الجد والاجتهاد

قلتله: تمام يابنى احنا بلدنا اصل التقدم امال ايه ..مش هم بتاخدوا مننا العماله عشان احنا مخنا انضف مخ فى الوطن العربى جمعاااااااااااء؟

مفيش مانع كمان انكم يقلدونا فى الجد والاجتهاد والمثابره ويتعبوا تعبنا ويحسوا بالقهر الى احنا فيه

قلتله بس يا عم الحاج كفايه عليا يابنى كفايه كده انت عقدتنى.. ودخل اخويا وقالى بت يا دودو اقولك نكته؟؟

قلتله لع لع لع انت نكتك بايخه وقديمه ياعم اجرى من هنا

قالى لا والله دى جديده خالث اسمعى بس

قلتله اتفضل احكى هــا

قالى مره واحد مسؤل كده عن شئون الناس ماشى فى الشارع هو ووكيل اعماله الى بيقوم بكل المهام

( انتوا فاهمين بقى الدليفرى وتوصيل الطعام للمنازل ده) واذ فجأه لقى طابووووووور طويـــــل كده

(على اساس برضه ان اخويا مش واخد باله انهم طابورين ) فالمسئول قال لوكيل اعماله نهارك الوان يا كلين ايه الطابور ده ؟؟

قاله: طابور عيش يا افندم . قاله: نهارك اسود ومش كلين خالص هى الناس لسه معاها فلوس تشترى عيش؟

قاله: لالالالا يا افندم احنا بنبذل قصارى جهدنا بس نعمل ايه دول عالم ماشيه بالبركه!!

قاله نهار طين يا كلين .. انت لسه مطلعتش قرار يقضى على البركه؟؟

بصيت لاخويا بمنتهى البلاهه وقلتله امشى من هنا بدل ما ضغطى يعلى .. وانت ماشى ابقى اسألى البركه دى بيشتروها منين؟

انا على الطريقة الصينية

السلام عليكم

متستغربوش ولا تندهشوا

انا قررت انى اعمل لنفسى وصفه والكل يجربها

زى ما فى اكل بيتعمل بالطريقه الايطاليه والفرنسيه والمصريه

ممكن نعمل طريقه تعامل على الطريقه الى تعجبنا

وبما ان معظم الناس فى مصر مبتحبش الاكل الصينى

او بتقرف منه بمعنى اصح

فانا قررت انى اعمل وصفه لنفسى بالطريقه الصينيه

ليه بقى يا دوليتا اخترتى الطريقه الصينيه الى محدش بيحبها؟

اولا: الناس دى او الصينين بيخترعوا اى حاجه ومن كل حاجه وبابسط الطرق واحنا بنحس انها حاجه جامده جدا

ثانيا: الحاجات الصينى عمرها قصير جودتها يعنى مش قويه اوى زى الفرنسيه واليابانيه مثلا وانا مش بروفسيره فى مجالى واكيد مش هتبقى طريقتى سليمه لمده طويله

ثالثا : وهو ده المهم رغم ان الاكل الصينى مفيد جدا للصحه الا اننا مبنحبهوش ولان طريقتى سهله ومفيده فاكيد محدش هيحبها

ليه محدش هيحبها؟؟ امال بتعمليها ليه؟

محدش هيحبها لان ربنا اما وزع الارزاق محدش عجبه رزقه ( الطمع بعيد عنكم)

واما وزع العقول كل واحد عجبه عقله

احنا شعب يحب يتكلم كتير ويكون هو التوب فى المناقشه وميسمعش لاراء الاخرين

ولو سمع بيبقى على مضض "ايوه ومحدش يجادل"

بيحب يفيد الكل برأيه ولا يستفيدش برأى حد

( حتى لو قال انا بتقبل النقد بيبقى على اعصابه)

حد هيقولى طب ما انتى منهم

انتى جايه تقولى لنا على طريقه للتعامل وشايفه ان محدش بيتعامل مع الناس احسن منك

وانك بتعرفى تتكلمى والمناقشه مع اى حد بتحطيها فى جيبك وبتبقى برضه انتى التوب

استفدتى ايه وانتى عماله ترغى وتتكلمى ومبتسمعيش لحد؟

هرد عليك بسهوله واقولك

اصلى واحده من الشعب المصرى

ومش هحاول اقنعك لان مجرد محاولتى اقناعك تدل على انى فعلا بتكلم كتير

وبما انى عايزه اوصلكم الوصفه السحريه بتاعتى الى بتعامل بيها مع كل الناس

فانا جيت وكلى فخر وغرور عشان اثبت انى واحده من الشعب ده

شعب طموح وبيحب يبقى القائد دايما

أنا

ايوه... انا اسطوره اعجبتنى نفسى منذ الوهله الاولى

انا من تيقنت ان اسلوبها سيحل مشاكل العالم اجمع

انا من نادت بالحريه للعقل والفكر

اذن فانا رائده فى مجالى

وبما ان كل واحد فينا من جواه عارف حقيقته كويس ..

مش غرور لا سمح الله ولكنها نسبه ذكائنا الغير عاديه فى معرفه اننا احسن من غيرنا

فلكل منا طريقته المثلى فى التعامل مع الاخر

واكيد شايف انه فيه عيوب ولكنه دائما فى اعتقاده انه هو الافضل

متزعلش ولا تتخض انها الطبيعه البشريه والتحفذ للوصول للكمال

ابحث بداخل نفسك وان وجدت طريقتك للتعامل مع الناس والدخول لقلوبهم باقل مجهود

فاخبرنى ماهى هى طريقتك

ملحوظه::" ان وجدتها"::

اعتقد وصلتوا لطريقتى الصينيه الى محدش هيحبها

ولو موصلتوش للوصفه السحريه

يبقى احنا فعلا الشعب الاعظم والاعرق على مدار السنين والقرون

دمت بود

أبله دودو مدرسه فى مدرسة

السلام عليكــم ورحمـة الله وبركاتــة ،،

ازيكم يا ولاد وحشتونى كتير خالص موت بجد يعنى

في يوم من الايام انطسيت في عقلي وقررت اشتغل مدرسه

تشتغلي مدرسه فين يا بت يا دودو ... تشتغلي فين يا دودو فين ؟؟

(ده يعني علي اساس ان وزارة التربيه والتعليم بيت ابويا .. وانا حرة في املاك جدو الباشا ...)

بـــــــــــس وعرق الوطنيه لقيته واقف ادام عينى .. وقلت الوطن فوق كل اعتبار لااااااااازم اصلح المايل وافيد التعليم

بافكاري المستحيله امال ابويا علمنى ليه.. انزل الارياف ادرس للاولاد هناك امل المستقبل

(بقنع نفسي انه بمزاجي …مش عايزة كلام كتير لازم انمي الفكر هناك لابد احضرهم مش في كشكول التحضير لا من التحضر يعني)

.. و اشتغلت وامري لله .. دخلت الفصول وشرحت ودرست وفهمت وطلع عيني وراح صوتي وكرهت كل ماهو اسمه اطفال

وجائت اللحظه الحاسمه .. يوم الامتحان يهان المرء او يهان اخيرا هشوف ثمرة تعبي وسهر الليالي ومُر التوبلكسيل والسيبتازول و البرادورال

- يلا يا استاذة دودو اتفضلى استلمى المراقبه

ودخلت اللجنه ولقيت الاولاد حاضرين ومستحميين وانضف من الصيني بعد غسيله.. ايه العيال دي ولا كانهم في العيد

مسؤل الكنترول : وزعي الورق يا ابله دودو وخلى بالك

اووووووووووعي حد يقعد جمب حد اووووووووووعي حد يدخل معاه كتاب اووووووووووعي حد يكون معاه برشام

ايه الاخ الى بيسف زى الشريط البايظ ده

- لا لا اطمن يا استاذ دي ناس اعقل من كده بكتيييير مش معقول يخاطروا بحياتهم ويضيعوا مستقبلهم ناصع البياض بالافكار دي

(حسسني اني براقب علي طلبة ماجستير مش تانيه ابتدائي)

الولاد صعبوا عليا لازم وقولت نبتسم في وجوهم ونحسسهم بالامان والاطمئنان وخلاص كنت هغنلهم ماما زمانها جايه

لكن قطع حبل افكاري صوت ابله كايداهم زميلة الملاحظه في اللجنه وهي تنادي بصوت جهوري واللي بيفكرني دايما بمارد مصباح علاء الدين علي..

فهيم فهمي ابن اخوها عشان توصيني عليه علي ما تروح تنشر الغسيل

- غسيل !!! هو مش حضرتك مراقبه هنا ولا ايه النظام ( دا انا برضه)

ابله كيداهم :صحيح ما انت مش عندك مسؤليات ولا بيت ولا عيال عايزين يرجعوا البيت يلاقو اكل جاهز وهدوم نضيفه وكنس ومسح وتنفيض

( ايه الست اللي كارهه الحياه دي !! هو انا اللي قلتلها اشتغلي جتكوا وكسه مليتوا البلد قال معنديش مسؤليات قال .. اومال ايه اللي رماني الرميه دى
وبكل ود وحنان بثيت روح النضال في التلاميذ يلا يا ولاد كل واحد يركز كويس عشان تنجحوا وتتفوقوا .. انتو امل البلد .. انتو شمس المستقبل ..

انتو ....و قاطعني صوت مسرسع طلعت البنت ( ست ابوها )

بنظرة عينها البريئه اللي تحتار فيها من كتر البلهه والعته متقدرش تحدد ان كانت بتبص اودامها ولا وراها

-ابله ابله السؤال ته نخدنهوش ( اما الحق انزل بالترجمه قبل ما توهوا مني )

ابله: السؤال ده ما اخدنهوش

انا : ازاي يا بنتي دي النقطة دي بالذات شارحاها 15 مره في الفصل

قام مغاوري بكل حماس وقال .. كداااااااااااابه يا ابله اخدناه

-انا شوفتي عشان تعرفي انك نايمه وانا بشرح انتي ..

مخيمر تاني .. لا يا ابله ده استاذ مخلص عاطينا السؤال مع اسئلة الامتحان في الدرس وكلنا حافظنها بس هي اللي خايبه ومش عارفه حاجه .

-( استاذ مخلص امين مدرس الرياضيات !!( فعلا اسم علي مسمي وفى مثل ذات اللحظه دخلت الابله نبويه الى كلها مفهوميه

وبصوت كله حنيه ميفرقش كتير عن صوت مدفع رمضان....

كله يبصلى ويركز ولقيتها بكل خفه اخدت ورقة الطالب شحته .. والتفتت للسبوره , ومسكت الطبشوره .. وكتبت ... حل السؤال الاول

- (ايـــــــــــــــــــــــــــــــــه ده قرطاس جوافه ادام سعادتك؟ انا واقفة هنا ولا انا بيتهيألى ايه الى بتعمليه ده يا استاذه نبويه ده ممنوع

بصتلي كاني شتمتها وكشرت عن انيابها ونادت بصوت عالى زي صوت الغاره .. يا استاذ اميــــــــــــــــــــن

( وتقولشي امين ده كان اعد علي اوكرة الباب) فيه ايــــــــــــه ( وداخل دخلة صلاح الدين للقدس قال ايه الابله بتقولك ممنوع كلم بقى ...

كلم دي سماعة تليفون قدامها ولا ايه ...

استاذ مخلص امين : ايـــــــه ده انت وشك اصفر كده ليه .. مالك دايخة كده.. كل ده صداع .. لا لا انت لازم ترتاحي اعتبرى نفسك داخل لجنتك

يا عم ملواني عندك واحد شاي واسبرينه للاستاذة دوليتا اتفضلي يا استاذتنا فى اوضة المدرسات ومتشيلش هم خااااالص

وفجاه لقيتني بره بقوة الدفع وبعد الامتحان ادونى راحه من التصحيح وعفوني من التجميع وقالولي روحي البيت ارتاحى انتى

مش مهم اى حاجه المهم انى مش اخالف ضميرى

ويدوب وصلت لبوابة المدرسه ولقيت طفل بريء بكل برائة الذئاب اللي في الدنيا قال ... هي دى بيشاور عليا .. ولقيت اهالي

كتيـــــــــــــــــــــــــــــر بيجروا عليا ايه الناس الغريبه دي النتيجه لسه مظهرتش عشان يشكروني

(يا هل ترى.........) لسه مخلصتش تفكير ولقيت النور انطفي ......

متتخضوش .. النور رجع ولقتنى فى السرير وقررت انى مش اشتغل مدرسه تانى

حلمت بـ((صـــلاح الدين القليــــــوبى))

انا جيت انهارده احكيلكم حلم كميل ياريت يتحقق .. ياااااااه هنرتاح كتير موت

((( طبعا هو مش حلم هو مجرد اسلوب للتعبير عن الفكره )))

حلمت خير اللهم اجعله خير.. انى قابلت شاب وسيم كميل اوى خالث


لابس ابيض فى اسود ... وراكب عربيه تويوتا كرولا .. بس بجد كانت جامده موت

وحاطت جيل فى شعره والصراحه شعره جميل اوى .. اللهم لا حسد يعنى

سألته انت اسمك ايه..قالى: عبـــــــــــود .. لالالالالالالا بهرج قالى اسمى صلاح الدين

يا فرحتى لما عرفت انه صلاح الدين .. قلتله بس فوكك انت الى هتقدر تحققلى امالى وتشيل غيوم الحزن عن ايامى ايها الشاب الكميل الوسيم


قالى: ليه انتى شيفانى صلاح الدين الايوبى .. انا صحيح صلاح الدين بس صلاح الدين القليوبى لسه جاى من بنها

قلتله مش مهم المهم انك هتعمل حاجه كويسه وتخلى الدنيا وردى وفوحلقى وجميع الالونانات الكميميلات


قالى : اه اكيد ادعى بس ان احنا نقدر نكمل المسيره ونعمل حاجه

قلتله: هايل يا كميل.. وياترى ايه اول حاجه هتعملوها؟؟

قالى: اولا وليس فى الاول هروح أحرر الأسرى من كافتيريا الجامعه واخليهم يحضروا المحاضرات عشان يناموا فيها بدل ما فلوسهم طايره على الكافيهات كده .. ناخدها احنا


قلتله: يااااااه انت فارس احلامى الى كنت بدور عليه من زمـــــــان


قالى : طبعا يا بنتى منا مش هسكت عند كده انا هخليهم كمان يجيبوا الاكل بتاعهم والشاى معاهم فى المحاضرات ويعزموا على الدكاتره كمان .. امال احنا ناس بنعرف الذوق


قلتله : تمام زى ما كنت بتمناك كلك رقه .. كلك زوق.. كلك ... انتوا فاهمين بقى


قالى: انا كنت بفكر نعمل حركه تحررونسميها ( فوكك من الى يشكك)

ونخلى كل شاب يدفع ربع جنيه لما يجى يدخل المدرج عشان يحضر المحاضره .. واى شاب قاعد على الكافتيريا نخليه يدفع نص جنيه..


قلتله : تمام اوى اوى خالص جدا .. كده هتكسبوا كتير


قالى : اكيد احنا ناس فاهمين استراتيجيه الشاب هم هيدفعوا فى كلتا الحالتين .. ولانهم بيحبوا الكافيهات والكفتيريات هيدفعوا نص جنيه كده هنجمع فلوس كتيره


قلتله: طب وهتعملوا ايه بالفلوس دى يا شاب يا كميل يا وسيم


قالى : لا متفهمنيش غلط احنا هنوجها صح .. هتمعلهم حفلات ورحلات باسعار رمزيه 25 جنيه للفرد وكل واحد يطلع مع المزّه بتاعته ونوديهم رحلات ترفيهيه تحت عنينا

قلتله : هايل اوى هتاخدنى معاك على حسابك بقى


قالى : نعـــــــــــم وانا بتعب واشقى عشان اطلعك على حسابى ولا ايه.. وبعدين معندناش بنات بتدخل ديسكو .. احنا رجاله ودمنا حامى


قلتله: يااااااااااه انت زى ما انت كده كنت بدور عليك من زمان اوى.. شاب كله نخوه ورجوله


قالى : اه طبعا.. احنا هنطلعهم رحلات للملاهى وصالات الديسكو عشان يبقوا تحت عنينا امال ايه .. احنا مبنحبش قله الاحترام..


قلتله: ونعم الشباب ايوه كده .. كده صالات الديسكو والملاهى هتبقى محكومه بضوابط


قالى : اه وبعد ما فلوس الرحلات تخلص هنعمل مظاهره

قلتله : ليه بقى ..

قالى : ايــــــــــــه انتى نسيتى .. لازم نرجع نحررهم تانى من الكفتيريا.. دى حركه كفاح جامعى يا بنتى احنا بنتعب اوى


قلتله : لا عندك حق.. انت قولتلى اسمك صلاح ايه؟؟؟؟

"ان الله لا يغير ما بقوم حتى يغيروا ما بأنفسهم "

احنا ليه مستنين حد يحسسنا اننا واقعين فى مشكله ضخمه فى الجامعات بتاعتنا

لحد امتى هنفضل كده ولحد امتى هنقول احنا بندن فى مالطه؟

مش مستحيل ابداً ان التعليم يتطور للاحسن

ما دمت انت وانا وكل الى زينا مازالوا موجودين

مـش مستحيل

السلام عليكم

ده اول توبيك ليا فى البلوج

وجايه اعرفكم بس على البلوج فكرته ايه

انا عن نفسى بقول مش مستحيل

مش مستحيل ان الناس تحس ببعضها فى يوم من الايام

ومش مستحيل ان البلد حالها يتعدل فى يوم من الايام

ومش مستحيل اننا نتغير من جوانا مع مرور الايام

ومش مستحيل انى الاقى وظيفه محترمه بعد كل الشهادات الى اخدتها دى

بس المستحيل انى اصدق ان حد ممكن يسمعنا بعد كل ده

اهلا بيكم فى بلوج مش مستحيل

معانا مش هتقدر تقول ممكن او مش ممكن

ينفع او مينفعش

كل شيئ ممكن وكل شيئ جايز !!